ജന്മാന്തരം

ജന്മാന്തരം

ഈ വയൽ പൂവിതൾത്തുമ്പിലെത്തൂമഞ്ഞു

തുള്ളി ഞാനായിരുന്നെങ്കിൽ!

പ്രിയനേ നിനക്കു നിൻ മുഖമൊന്നു കാണുവാൻ 

കണ്ണാടിയായ് മാറിയേനെ.

കാറ്റായിരുന്നു ഞാനെങ്കിൽ നിൻ തോൾ ചേർന്നു

ചങ്ങാതിയായ് നടന്നേനെ.

കുളിരായി നിന്നെപ്പൊതിഞ്ഞുറങ്ങാൻ മഴ-

ച്ചാറലായിക്കിളിയാക്കാൻ,

കാറ്റിന്നലകളിൽ പാറും പരാഗമായ് 

നിന്മുഖം  ചുംബിച്ചു പോകാൻ,

നീയുറങ്ങുമ്പോൾ നിലാവിന്റെ ചിന്തായി 

കിളിവാതിലൂടെത്തിനോക്കാൻ,

മോഹം പൊറാഞ്ഞനുരാഗിണി ഞാൻ വൃഥാ

സ്വപ്നങ്ങളെത്രയോ നെയ്തു!

ഏറെത്തളർന്ന നിൻ പാദങ്ങൾ വല്ലാതെ 

നോവുമ്പൊഴൊന്നിളവേൽക്കാൻ,

മാമരച്ചില്ലതൻ ശീതളച്ഛായയായ് 

സുമശയ്യയായി ഞാൻ മാറാം.

രാഗമായൊഴുകിപ്പരക്കട്ടെ ഞാൻ നിന്റെ-

യുള്ളിലും ചുറ്റുമെന്നെന്നും,

കാത്തിരുന്നീടാമനന്തജന്മങ്ങളിൽ

പ്രാണനേ നിന്നിൽ ലയിക്കാൻ.

തപമാണു ജന്മങ്ങളോരോന്നുമെൻ സഖേ

നീതന്നെയാകുന്നു വരവും!

                                                                                   (മെയ് 2013)