Follow by Email

Wednesday, 12 February 2014

ഉള്ളിൽ ഉള്ളത്.....

ഉള്ളിൽ ഉള്ളത്.....

മനസ്സിന്റെ ഒരു പാതിയിൽ
ഒരു കൊടുങ്കാട് ഒളിപ്പിച്ചിരിക്കുന്നു ഞാൻ.
ആരും കണ്ടിട്ടില്ലാത്ത
വനപുഷ്പങ്ങളും,
കന്യകാത്വം നഷ്ടപ്പെടാത്ത
കാട്ടരുവികളും നിറഞ്ഞ,
വന്യമൃഗങ്ങൾ ചുരമാന്തിയലറുന്ന,
കാട്ടുതീയാളിപ്പടരുന്ന,
കൊടുങ്കാറ്റു താണ്ഡവമാടുന്ന
ഒരു കൊടുങ്കാട്.

മറുപകുതിയിൽ
ഒരു കരകാണാക്കടലും.

മത്സ്യകന്യകമാരുടെ
മാന്ത്രിക സംഗീതവും,
അനശ്വരപ്രണയങ്ങളുടെ
ഹംസഗാനവും,
രത്നഗർഭം കനത്ത
അടിവയറും,
പ്രാണൻ വലിച്ചൂറ്റുന്ന
വൻ ചുഴികളും,
വിഷം തുപ്പിനേർക്കുന്ന
കടൽനാഗങ്ങളും,
എരിഞ്ഞടങ്ങിയ സൂര്യന്റെ
കരിക്കട്ടയും,
ശതസഹസ്രം നീരാളിക്കൈകളും നിറഞ്ഞ
ഒരു കരിങ്കടൽ,
അതോ ചാവുകടലോ!!!

2 comments:

  1. ഉള്ളിലെ കൊടുംകാടും കരകാണാക്കടലും വായിച്ചു
    ആശംസകള്‍

    ReplyDelete
  2. എരിഞ്ഞടങ്ങിയ സൂര്യന്റെ
    കരിക്കട്ടയും,കാണാത്തത് അറിയാത്തത്
    ശാന്തം ഘന ഗംഭീരം

    ReplyDelete